Á UngRIFF eru börn og ungmenni í aðalhlutverki sem áhorfendur og skaparar. Kvikmyndahátíðin UngRIFF fer fram á haustin en hátíðin starfar allt árið og sinnir kvikmyndafræðslu af ýmsu tagi, m.a. með námskeiðum í stuttmyndagerð á borð við Stelpur filma! og Krakkar filma! Leik- og grunnskólabörnum um land allt gefst færi á að horfa á kvikmyndir á vegum UngRIFF eina önn á hverju ári í samvinnu við skólana þar sem í boði eru alls kyns þemu á borð við umhverfis- og jafnréttismál.

Frá upphafi hefur RIFF sýnt myndir fyrir unga aldurshópa en árið 2023 var hátíðin UngRIFF stofnuð því það er verk að vinna. Markmið UngRIFF er að efla kvikmyndalæsi og sýna kvikmyndir sem annars færu ekki í sýningu hér á landi. Lögð er áhersla á samsköpun; ungmennum gefst kostur á að sitja í Ungmennaráði, koma hugmyndum sínum á framfæri og skipuleggja hátíðina í samvinnu við stjórnendur. Ungmennaráð ákveður m.a. hverjir fá heiðursverðlaun UngRIFF ár hvert en þau hafa hlotið m.a. Örn Árnason leikari, Stúdíó Sýrland og KrakkaRÚV.